عفوا شوية خربطة بالحكي

ما شاء الله ... ما شاء الله ... ما شاء الله

ربنا يوفقكم ويحفظكم ( عفريته + صرخة )
ـــــــــــــــ
يعني لو في واحد ماشي لحالو وفي منطقة خلا ... فجأة شاف (عفريته)
ردة فعلو حتكون (بصرخة) قوية كثير عشان يتغلب على الخوف.
طيب لو كان بدل ( عفريتة ) وحدة شاف مجموعة عفريتات
أكيد ح تكون ردة فعلو مجموعة من ال (صرخات)

طيب إحنا زمان كنا مش خالصين من العفريته لحالها
يللي صار ياجماعة إنو العفريته إتعرفت على صرخات
وإحنا بدون هالتعارف كنا متورطين
يعني في رأيكم شو بدو إيصير لما تجتمع ( صرخة وعفريتة )

ممكن يكون في هناك ... مثلاً ... مثلاً : مؤامرات ، مقالب ، كمائن ، حرب ،
مهو كان هاد يللي كان ناقصنا ( حرب ) والله إشي حلو
يعني بنصير إنّام ونصحى على صوت القصف
وبنصير نفتح الراديو ع الأخبار
تنشوف شو يللي صار

معقول ؟ ياجماعة هالحكي معقول ؟
ممكن أكون أنا غلطان ، وعم بفترض شغلات بالأوهام
ممكن أكون أنا ما إقدرت أحلل اللقاء مزبوط عشان هيك طلعت معي هالخربطات
طيب همّ شربو نسكافيه
يعني راحو على مقهى تاني غير مقهانا
لأنو أحمد ما بيعمل نسكافيه في مقهانا ( النساكفيه مشروب أمريكي )
آآآآآآآآآآآه ممكن أتصلوا مع أوباما ... وإتهمونا بإنو إحنا عم نعمل إرهاب
والله إحنا يادوب بنشوي كباب ...
طيب ممكن يكون النساكفيه الأمريكي يللي شربوه ما كانو بيقصدو إشي
وممكن ما إتصلوا مع أوباما ...
طيب لشو طلع إمبارح أوباما يعمل خطاب ....
آآآآآآآه ممكن اوباما هو يللي إتصل معاهن عشان يقوي حالو بالإنتخابات
( عفرينه وصرخات ) إذا إلتقوا بعملوا العجب العجاب ... والمشكلة إنو تم اللقاء

شكلي أنا سطلت كثير كثير
شكلي مش عارف شو عم بيصير
طيب ليش حلف الناتو عم يعمل كزدورة بطياراتو بالجو
ليش ما بيقصف الكتائب حولين مصراته أو الزاوية والزنتان
شو خايفين من إيش ... المدنيين ... في هناك أهداف واضحة كثير.
شو في عندهم أجندة خاصة .؟ 17 علامة سؤال وشو الحواب
ممكن يكون الجواب شو
شو عم بتقول ..بترول ...
والله كل البترول مش إغلى من قطرة دَمْ ليبية
بحب أقول إلكم أنكم ع الأرض ما تحلموا تنزلوا
مش رح تدوس أقدامكم أرض ليبيا
مش رج تتكرر أفغانستان والعراق
طيب ليش ما بتبيعو أسلحة للثوار
والله في براسي الف سؤال وسؤال
طيب أردوغان والله إنا بنحبو كثير ...
ومواقفو معانا إشي بيرفع الراس
لكن شو يللي صار ... الف علامة إستفهام وألف علامة إستهجان
طيب مهو القذافي مش مخلي زنقة إلا وقصفها وأدماها
والله جميعنا أهلك يا إيمان العبيدي
إيمان يللي إتحَدَّت الطغيان ...إتحدت القذافي ورجاله
إيمان بألف راجل.
لأردوغان أقول لا نريد أن نمسك العصى من الوسط
ليس الآن يا أردوغان
أحببناك ولا نريد أن يخيب نظرنا فيك
بعرف إنك رح توخذ الموقف الصحيح
لكن أرجوك ما تتأخر ... التأخير يحتمل الكثير من الدم ... ونحن لا نحتمل المزيد

شكلي عم بخربط كثير
أوووه الساعة صارت 12:15 بعد نص الليل
وأنا عم بَقِّلبْ التلفزيون من محطة أخبار لمحطة أخبار

الباشا أوباما عم يحكي إنو لازم يشوف حلّ بين الفلسطينيين والإسرائيليين
وهاي طالعة شلة من اليهود بمبادرة سلام على اساس المبادرة العربية
خايفين إنو العالم يعترف بدولة فلسطين في سبتمبر القادم
والله ياعمي هالثورات العربية جابت لإسرائيل الدَّوَرْ
مقلوبين رأساً على عقب
يا جماعة هالمبادرة فيها 5 نقاط مدمرة
- دولة بدون سلاح (عجبتني هالفكرة ) بيصير عباس رئيس البلدية المسؤول عن لم الزبالة من الشوارع ( هاظ إذا طلعلو)
- تبادل أراضي ( يعني عرب ال 48 سيكونوا في مهب الريح ) وببدلوا الصحرا بالمستوطنات ويتظل المستوطنات على حالها يؤر دمار وفساد ( مهو دولتنا ح تكون بدون سلاح)
-تقسيم القدس ( أي هو شو ظايل يا حنين من القدس )
الحرم القدسي الشريف وبقية الأماكن الدينية تحت سيادة إسرائلية دولية ( يعني ... إنتوا عارفين شو يعني )
- حائط البراق تحت سيطرة اليهود.
شكلهم حاسين إنو آخرتهم قَرّررربت
لأنوا الحكام الأنذال عم بيكنس فيهم الشعب لمزبلة التاريخ
الهدف منها إستباق الأحداث
لان العالم يعرف إنهم بدهمش سلام وبدهم يجعلوا الكرة في ملعبنا


معلش أعذروني على هالضحكة
مهو إشي بيجلط (( لأيمتن بدو إيظل هالإنقسام ))
يا جماعة فلسطين فوق الجميع
علم فلسطين بأيدينا
ولن يسقط من أيدينا علم الأحرار المُشرعْ

معلش إتحملوني شوية

إيران عم تتدخل في شؤون البحرين ( أجندة خاصة) وعم بتعادي دول الخليج
عم تتجسس على الكويت.
إيران عم تتغزل في مصر
مصر هي مركز الثقل العربي ... مصر أصبحت الآن غير شكل
مصر الثورة هي القوة العربية الضاغطة والمؤثرة والسند القوي لجميع العرب
((( تحيا مصر ... يحيا شعب مصر العظيم ... مصر خير أجناد الأرض )
( لا يجب الخلط بين المسائل الدينية والمسائل السياسية )

ــــــــ
تحيا تونس ... تونس الحرة ...
المجد للتوانسة ... بن علي هرب
على راسي من فوق يا البوعزيزي يللي فجرت الشارع العربي وأشعلتها نار
يا توانسة بعد أزلام النظام بيحاولوا يسرقو ثورتكم ... ما فيش خوف تاني
وحدة حرية عدالة إجتماعية

يا جماعة الهوى يماني والحكمة يمانية وأصل العرب من اليمن
والعرب أنواع ( العرب البائدة والعرب العاربة والعرب المستعربة )
وعلي صالح : كان أيام الحرب على غزة كان بينادي وب(يصرخ) (القمة القمة ) ولمن صارت القمة في قطر إختفى
كأنو ( عفريته ) أخفتو في مكان ما ولم يعد يظهر ... هلا والله ... مرحبا طللوا وينك يابو المراجل
علي صالح مقربط بالكرسي ... شكلو ما عم يفهم
رايح ترحل يعني رايح ترحل قالوها بساحة التغيير.

سوريا وبشار وشوية بوشار
أنا مش عارف شو يللي صار
مسلحين بيقنصو بالناس والحكومة ما بتعرف عهنم إشي ( هيك عم بيقولوا) يعني بتعرفو شو لون الملابس الداخلية للمواطن وما بتعفروا مين يللي عم بيطخهم بالمظاهرات ...
(نفس الشيء عند علي عبدالله صالح)وقصة البلاطجة أو البلطجية يللي بالشام (بقصد بلاد الشام) بيطلقوا عليهم لفظة الزعران.
قناصة ... مجهولين ... أي طُز بالأمن وبالمخابرات وبكل هالأجهزة يللي ما بتعرف غير كيف إتنكد علينا عيشتنا وتخليها أسود من القطران.

عفوا شكلي سرحت شوية بنرجع لسوريا ومن حقي أتسائل
طيب ممكن تقولو لي كيف حاميين هالحدود
مهو بعشر ورقات على حدودكم بيتم شراء ضابط الجمارك
الناس بدها إصلاح وبدها تحارب الفساد وبدها بَسْ شوية كرامة وحريات

ماشي ماشي ... أنا بعرف بأن سوريا عم تتحمل عبء كبير في موقفها الممانع ضد كل هالمخططات الصهيوأمريكية بالمنطقة
وإحنا نقدر ونثمن لها إحتضان المقاومة
ولكن بحرية الشعوب وبمشاركتهم تكون سوريا أكثر قوة
نحن نريد سوريا قوية ... عزيزة منيعة

في الأردن شلة المستفيدين بدهم إشعلولها ( طائفية / عنصرية )
مثلهم مثل كل المتسلقين في الحكومات العربية البائدة ويللي في طريقها لأن تكون بائدة
لكن شباب التغيير مصرين على موقفهم
في الأردن في أصوات كثيرة حتى من الحكومة مع التغيير
لكن متى سيحصل التغيير ... الناس طفشت من الوعود وبدها تشوف أفعال مش مجرد كلام.

طبعا أعتذر من الجزيرة
كثيرا ما يشتمهم الظلمة أعداء التغيير المستفيدين من الفساد والشلة تبعتهم
مااااششششششي
وعلى رأي الليبين :
نعتذرولك يا جزيرة
والله مانك حقيرة
ها شو خلاني إجيب سيرة الجزيرة
والله أنا ما بشتغل معهم ولا بيدفعولي إشي
بس الصحيح صحيح

وتحيا الثورات العربية
تحيا الوحدة العربية
تحيا الوحدة الفلسطينية
(( وإطلع يا قمرنا وهِلْ وضَوي الكرة الأرضيه
ما خلقنا تنعيش بذلْ .../ خلقنا نعيش بحرية )))

جـزاك الـلــه ألـف خـيــر ووفـقـك الـلــه لكـل مـا يـحــبـه ويـرضــاه