قال رسول الله صلى الله عليه و سلم:
...والذي نفسي بيده لا يؤمن أحدكم حتى أكون أحب إليه من نفسه وماله وولده والناس أجمعين
وفي الصحيح أيضاً أن عمر رضي اللّه عنه قال:
يا رسول اللّه، واللّه لأنت أحب اليَّ من كلّ شيء ،
إلاّ من نفسي..
فقال صلى اللّه عليه وسلم:
لا يا عمر حتى أكون أحب إليك من نفسك ..
فقال عمر: يا رسول اللّه واللّه لأنت أحب إليَّ من كل شيء ،
حتّى من نفسي..
فقال صلى اللّه عليه وسلم: الآن يا عمر
بصراحة أول ما سمعت الحديث ده تعجبت جدا
ازاى سيدنا محمد بيقولنا
لازم نحبه أكتر من كل شىء
حتى أنفسنا
و الا بكده لن يكون اكتمل ايماننا
ما حبيتش أفكر كتير لاحسن الواحد دماغه تروح كده و لا كده
و الشيطان شاطر و مذاكر كويس
قلت حاسمع الكلام و خلاص
بس كل ما أسمع الحديث الاقى نفسى برضه مش مرتاحة
مش فاهمة
ليه حب النبى صلى الله عليه وسلم شرط لاكتمال الايمان
و الحمد لله أخيرا ربنا فتحها عليا و فهمت
لما تحب حد بجد
حتعمل كل اللى يطلبه منك برضا و على أكمل وجه
يعنى مثلا الزوجة لما تطبخ لزوجها و هى بتحبه
بيبقى الأكل له طعم خيالى
لكن لو ف يوم زعلانة و متخانقين
الأكل حيتعمل حلو و كل حاجة
بس مش زى الأكل اللى معمول بحب
يعنى ربنا أرسل سيدنا محمد صلى الله عليه و سلم
يقول للناس أفعلوا و لا تفعلوا
و ليس لكم من جزاء عندى الا الوعد بالجنة
و ان لم تفعلوا فجزائكم النار
و الناس أساسا مش مقتنعة بغيبيات و لا حاجة
ايه اللى يخليهم يسمعوا كلام النبى
ممكن الانسان يقتنع بعقله
لكن لو قلبه ما أقتنعش سهل جدا يغير رأيه
الحب هو اللى بيخلق الثقة ف اللى قدامك و يخليك تصدقه
زى ما سيدتنا خديجة رضى الله عنها
أول ما جاء أمر الرسالة من غير ما تعرف ايه الحكاية بالضبط
قالت له
والله لا يخزيك الله أبدا؛ إنك لتصل الرحم، وتصدق الحديث، وتحمل الكل، وتقري الضيف، وتعين على نوائب الحق
بتحبه و بتثق فيه
و كذلك سيدنا أبو بكر رضى الله عنه و أرضاه
بيحب النبى و يثق فيه
و كمان لما نحب حد بنفذ كل اللى يطلبه بقلب راضى
اذا كان المثل بيقول ضرب الحبيب زى أكل الزبيب
يبقى بقى اللى بيأمرنا لصالحنا نحبه قد ايه ؟
ليه نحب النبى ؟
عشان هو اللى هدانا لربنا
هو السبب انى مش حادخل النار ان شاء الله
طب الشيطان حيقولى
ما هى ديه وظيفة سيدنا محمد انه يبلغنا الرسالة
تحبيه ليه ؟ ده شغله
اه صح الرسالة ديه شغل النبى و هو كده كده كان حيوصلها لنا
بس ايه اللى يجبر سيدنا النبى انه يحبنى
ما هو ممكن يبلغها عادى من غير ما يحب حد
و ايش عرفك ان النبى بيحبك
هو يعرفك أصلا
هو ما يعرفنيش لسه
بس هو قال انه مشتاق لى
و بكى عشانى
بكى الرسول صلى الله عليه وسلم
فقالوا ما يبكيك يا رسول الله
قال: اشتقت لإخواني
قالوا: اولسنا إخوانك يا رسول الله
قال: لا انتم أصحابي اما إخواني
فقوم يأتون من بعدي يؤمنون بي ولا يروني
و يا رسول الله أشهد الله اننا نحبك
ونشتاق الى رؤياك
و لو نظرة ف المنام تطفىء نار الشوق
طب ازاى أحب النبى ؟
نقرا سيرته و نتعلم منها
حنلاقى سيدنا النبى أعظم شخصية ف التاريخ
حتى ان الغرب غير المسلمين شهدوا له بذلك
و ازاى نخلى النبى يفرح بينا ؟
نطبق سنته و نسمع كلامه
عشان بنحبه و بنحب ربنا
عارفين فى حديث سمعته عن حاجة وحشة قوى
أن سيدنا النبى صلى الله عليه و سلم لما بيكون واقف ع الحوض
و ينتظر الناس ليسقيهم بيده الشريفة
و يأتى شخص للنبى
و النبى فارد دراعاته عشان ياخده بالحضن
و تيجى الملائكة تمنعه و تسحبه بعيد
يقول سيدنا النبى أمتى أمتى
فترد الملائكة انك لا تعلم ما أحدثوا من بعدك
فيقول النبى صلى الله عليه و سلم :
سحقا سحقا بعدا بعدا
يا رب ما حد منا يتعرض للموقف ده أبدا
و عشان كده لازم نلتزم بسنة نبينا
عشان هى الطريق للفلاح ف الدنيا و الآخرة
عارفين ازاى عرفت ان سيدنا النبى بيحبنا بجد
ومش مجرد بيأدى الرسالة واجب
يوم القيامة وسط الحر و التعب و العرق و الزحمة
يجرى الناس ع كل الأنبياء عشان يشفعوا لنا
و يقولوا نفسى نفسى
الا سيدنا محمد اللى حيقول أمتى أمتى
سيدنا محمد ما أخدش الرسالة كده و خلاص
هو أحبها و أحب الناس
و لانه أكتر واحد بيحب ربنا
كان كل أمله ان الناس تعرف ربنا و تعبده
و يزعل قوى لو أن حد مات من غير ما يدرى برسالته
شوفتوا الحب بيعمل ايه
سحر و الله سحر
سيدنا النبى حبنا و عشان كده ضحى بكل شىء من الدنيا عشانا
و احنا مهما حبيناه مش ممكن حبنا يجيى ذرة ف حبه لينا
يبقى لو حبيناه أكتر من نفسنا قليل قوى
صح و لا ايه ؟
_____________________________
الأربعاء فبراير 04, 2015 3:10 pm من طرف daeah92
